Çka është dëmtimi i dëgjimit?
Humbja e dëgjimit nënkupton që keni ndjesi të zvogëluar ndaj zërave të cilat dëgjohen normal. Lloji dhe shkalla e dëmtimit të dëgjimit mund të jenë të ndryshëm dhe në të shumtën e rasteve mund të zgjidhet.
Përse është i rëndësishëm dëgjimi?
Dëgjimi për ne është i rëndësishëm që të jetojmë të plotësuar, duke na dhënë një burim të madh informacionesh.Këto informacione përfaqësojnë lidhjen mes nesh dhe botës rreth nesh.
Si funksionon dëgjimi?
Duke pas parasysh madhësinë e tij të vogël, veshi është një organ kompleks. Duke punuar si filtër i zërit, secilin zë që e dëgjojmë, veshi e kthen në impuls elektrik që arrinë deri në tru.
Veshi përbëhet nga 3 pjesë:
- veshi i jashtëm ( bula e veshit dhe kanali i dëgjimit)
mbledh tinguj dhe i përçon nga kanali i dëgjimit deri tek daullja e veshit. - veshi i mesëm ( membrana e veshit dhe 3 kockëzat e veshit çekiçi, kudhra dhe yzengjia)
zëri nga veshi i jashtëm shkakton dridhje në membranën e veshit, e cila nëpërmjet kockëzave të dëgjimit i transmeton në veshin e brendshëm. - veshi i brendshëm (kërmilli (cochlea) dhe nervi i dëgjimit)
Dridhjet që vijnë nga veshi i mesëm kalojnë kah kërmilli (cochlea)dhe i stimulojnë qelizat e dëgjimit dhe kështu shkaktojnë impulse elektrike, të cilat nëpërmjet nervit të dëgjimit arrijnë deri tek qendra e dëgjimit në tru.
Çka duhet të dini për dëmtimin e dëgjimit?
- Dëmtimi i dëgjimit mund të paraqitet në të gjitha moshat. Varësisht nga arsyeja, mund të jetë dëmtim i lehtë apo i rëndë, përkohësisht apo i përhershëm.
- Dëmtimi i dëgjimit shkakton gjendje të padukshme, mirëpo pasojat ndjehen, hutimi i njeriut, izolimi social, dhe ndryshime të tjera tek personi.
- Humbja e dëgjimit mund të jetë e lindur apo të ndodh gradualisht me kalimin e kohës.
- Tek të rriturit arsyet e dëmtimit të dëgjimit është mosha dhe ambienti i zhurmshëm. Ndryshimi i dëgjimit i cili ndodh në pleqëri quhet Prezbiakuzija ( pleqëri e shurdhër).Ndodh gradualisht dhe është i përhershëm. Tek të moshuarit dëmtimi i dëgjimit shpesh është e ngatërruar me shenja të demencës.
- Zhurma mund të çojë deri në humbje të dëgjimit gradualisht ( prezenca afatgjate në ambiente të zhurmshme) apo befasisht ( Zhurmë e madhe papritmas: gjuajtje, eksploziv, alarm..)
- Shpesh dëmtimi i dëgjimit përcillet me fishkëllimë në veshë.
